Y Cynllun Datblygu Gwledig
Mae Cynllun Datblygu Gwledig Cymru 2007 - 2013 yn cael ei gyllido gan Gronfa Amaethyddol Ewrop ar gyfer Datblygu Gwledig (EAFRD) a Llywodraeth Cynulliad Cymru.
Diben y Cynllun Datblygu Gwledig yw annog a chyflwyno gweithgareddau sy’n cynnal cefn gwlad a chymunedau gwledig, yn annog rheoli amaethyddiaeth a’r amgylchedd mewn modd cynaliadwy ac yn cefnogi arallgyfeirio yn yr economi gwledig.
Mae gan y Cynllun Datblygu Gwledig bedwar prif amcan, a elwir yn Echelau, sy’n cyd-fynd â blaenoriaethau’r Comisiwn Ewropeaidd o ran datblygu gwledig. Pwrpas yr Echelau yw:
- Echel 1 – Gwneud y sectorau amaethyddol a choedwigaeth yn fwy cystadleuol;
- Echel 2 – Gwella’r amgylchedd a chefn gwlad;
- Echel 3 – Gwella ansawdd bywyd mewn ardaloedd gwledig ac arallgyfeirio’r economi gwledig; ac
- Cynyddu’r defnydd o ddull gweithredu LEADER, sef gweithredu o’r gwaelod i fyny, o dan arweiniad y gymuned, gan ddefnyddio partneriaethau lleol i hwyluso adfywio cynaliadwy.
Mae Echelau 1 a 2 yn cael eu rhoi ar waith yn bennaf gan Lywodraeth Cynulliad Cymru, gyda phartneriaid, ar draws Cymru. Caiff Echel 3 ac Echel 4 eu rhoi ar waith yn lleol.
Yn Sir Ddinbych a Sir y Fflint, mae Echel 3 yn cael ei rheoli gan y Cynghorau Sir ar ran Partneriaeth Wledig Leol. Mae Cadwyn Clwyd wedi cyflwyno cais llwyddiannus i roi nifer o brosiectau Echel 3 ar waith yn Sir Ddinbych a Sir y Fflint. Nod Echel 3 yw arallgyfeirio’r economi gwledig drwy ddarparu:
cymorth i deuluoedd ffermio i arallgyfeirio i weithgareddau ar wahân i amaethyddiaeth;
cymorth i greu a datblygu microfentrau; a
chymorth i annog gweithgareddau twristiaeth.
Mae hefyd yn anelu at wella ansawdd bywyd mewn cymunedau gwledig drwy:
gefnogi gwasanaethau sylfaenol i’r economi a’r boblogaeth wledig;
annog adnewyddu pentrefi;
cadw ac uwchraddio’r dreftadaeth wledig; a darparu hyfforddiant i’r rhai sy’n weithredol yn yr economi gwledig.
Mae Cadwyn Clwyd yn rheoli a gweithredu gweithgarwch Echel 4 yn Sir Ddinbych a Sir y Fflint. Mae Echel 4 yn gweithredu ar batrwm LEADER drwy weithio gyda chymunedau i annog creu ffyrdd arloesol o gynnal datblygu gwledig yng Nghymru yn y tymor hwy. Mae cymorth ar gael hefyd i gyllido prosiectau cydweithredu rhwng Cymru a rhannau eraill o’r Deyrnas Unedig, a hefyd rhwng Cymru ac Aelod Wladwriaethau eraill o’r Undeb Ewropeaidd.
Gellir gwario ariannu’r CDG mewn wardiau cymwys yn Sir Ddinbych a Sir y Fflint. Ceir map a rhestr o’r wardiau cymwys isod;
Lawrlwythiadau
- Eligible Wards (PDF) English - Eligible Wards in English
- Wardiau Ardal (PDF) Welsh - Eligible Wards in Welsh
- Area Map (PDF) English/Welsh - Area Map in English/Welsh