Prosiect Adfywio Tir Comin Mynydd Helygain

Nod Prosiect Adfywio Tir Comin Mynydd Helygain yw hybu'r mynydd/tir comin er mwyn iddo gael ei reoli mewn dull cydlynedig a gofalus.  Wedyn bydd hynny'n creu tirwedd wirioneddol fyw i bawb yn y gymuned ac i bobl sy'n dod i weld y mynydd hefyd.  Y prosiect hwn hefyd yw uchafbwynt partneriaeth o unigolion a sefydliadau a fu'n gweithio ar ddatblygu ffordd ymlaen, arloesol a chyfannol, ar gyfer yr ardal hon.  Cadwyn Clwyd, Cronfa Cynaladwyedd yr Ardoll Agregau ar gyfer Cymru (CCAAC) Llywodraeth y Cynulliad, Cyngor Sir y Fflint a Chyngor Cefn Gwlad Cymru sy'n cyllido'r prosiect hwn ar hyn o bryd.

Yn dilyn ymgynghoriad cymunedol a gynhaliwyd ynghylch Mynydd Helygain yn 2002, penderfynwyd y byddai'r prosiect yn cael ei gynnal mewn tair rhan:

• 1.) Dehongli Tir Comin Mynydd Helygain
• 2.) Cyflogi Rhodiwr Cefn Gwlad i reoli'r dirwedd
• 3.) Adeiladu gridiau gwartheg.

Rhoddwyd cychwyn eisoes ar elfen ddehongli'r prosiect yn sgil llunio taflen o'r enw "Hanes Mynydd Helygain", DVD am y gymuned leol a hanes chwarela ac amaethyddiaeth ar Fynydd Helygain.  Mae Pecyn Addysg sy'n rhoi manylion hanes mwyngloddio yn yr ardal, y dirwedd chwarela a'r bywyd gwyllt ar y tir comin, wedi cael ei ddosbarthu'n barod i ysgolion cynradd ac uwchradd yn yr ardal.

Nod cyflogi Rhodiwr Cefn Gwlad yw hybu'r fioamrywiaeth ar y mynydd trwy reoli cynefinoedd a rhywogaethau, yn enwedig cadwraeth y Madfallod Dŵr Cribog, a chynnal a chadw'r SoDdGA (Safleoedd o Diddordeb Gwyddonol Arbennig) a'r ardaloedd AAC (Ardal Arbennig Cadwraeth).  Bydd y warden yn rheoli gweithgareddau anghyfreithlon fel tipio slei bach a cherbydau oddi-ar-y-ffordd yn ogystal â threfnu digwyddiadau cymunedol fel teithiau cerdded tywysedig a gweithgareddau â phlant ysgol lleol.

Bydd y gridiau gwartheg a adeiladwyd o amgylch y ffiniau yn sicrhau na fydd gorbori na rhy ychydig o bori'n digwydd ar y mynydd.  Bydd y gridiau gwartheg yn gweithredu fel ‘mynedfeydd' at y tir comin, a gobeithio y gwnânt i chi deimlo eich bod wedi cyrraedd tirwedd arbennig.  

I weld y daflen ddehongli a luniwyd ar gyfer yr ardal, cliciwch ar y llun isod.