Crynodeb o'r Prosiect

Gyda miloedd o adeiladau ar draws Gogledd Ddwyrain Cymru wedi eu gwarchod gan statws ‘rhestredig' a nifer o ardaloedd cadwraethol yn y dalgylch, mae'r cyrsiau yn rhan o strategaeth i sicrhau nad yw adeiladau hanesyddol y rhanbarth yn cael eu colli a'u difrodi drwy ddefnyddio technegau adeiladu anghywir.

Hyd yn hyn, mae'r prosiect sgiliau adeiladu traddodiadol wedi cynnal wyth ar hugain o gyrsiau, gydag ymhell dros ddau gant o unigolion yn derbyn hyfforddiant ymarferol mewn ailbwyntio gyda morter calch, plastro â chalch, defnyddio gorffeniadau traddodiadol, gwneud diagnosis o leithder, gwaith saer allanol, gwarchod meini ac atgyweirio gwaith brics.  Roedd adeiladwyr, penseiri, syrfewyr, plastrwyr, peintwyr, dylunwyr cartrefi, swyddogion cadwraethol, perchnogion cartrefi a myfyrwyr ymysg y rhai a fu'n bresennol.

Hyd yma, mae'r prosiect wedi bod yn llwyddiant ysgubol, gyda niferoedd da yn mynychu'r cyrsiau, adborth rhagorol a galw am gyrsiau pellach.  Drwy'r dyddiau hyfforddi a'r gweithgareddau hyrwyddo, mae'r prosiect wedi codi ymwybyddiaeth o'r angen am dechnegau atgyweirio priodol ar gyfer adeiladau hanesyddol, ac wedi cyfrannu  at gynnydd yn y ddealltwriaeth o adnoddau diwylliannol a threftadaeth yr ardal.  At hynny, mae'r prosiect yn gweithredu fel platfform i ddysgu pellach a datblygu sgiliau.

Partneriaid

Mae'r prosiect yn cael ei gefnogi gan Cadwyn Clwyd a Northern Marches Cymru fel rhan o LEADER+, rhaglen wedi'i chyllido gan Senedd Ewrop sy'n hyrwyddo datblygu ardaloedd gwledig drwy annog strategaethau arloesol tymor hir ar gyfer datblygiad cynaliadwy. 

Mae cyllid cyfatebol hefyd wedi cael ei ddarparu gan Lywodraeth Cynulliad Cymru a gan Gyngor Sir Ddinbych, Cyngor Sir y Fflint a Chyngor Bwrdeistref Sirol Wrecsam drwy gynlluniau Menter Treftadaeth Treflun.

Amcanion

• Codi ymwybyddiaeth o'r angen am dechnegau atgyweirio priodol ar gyfer adeiladau hanesyddol
• Cyfrannu at gynnydd yn y ddealltwriaeth o adnoddau diwylliannol a threftadaeth yr ardal
• Creu fframwaith prawf ar gyfer cyrsiau sy'n berthnasol i atgyweirio ac adfer adeiladau hanesyddol
• Cefnogi'r gwaith o ddatblygu sylfaen sgiliau ar gyfer crefftau atgyweirio adeiladau hanesyddol yn yr ardal LEADER +
• Annog busnesau lleol i gael gwell ymwybyddiaeth o sgiliau adeiladu traddodiadol, a fydd yn rhoi rhagor o hyder iddyn nhw wrth dendro am waith cadwraethol, a thrwy hynny adfywio'r economi leol

Buddion Tymor Hir

• Cyfle i weld twf lleol o fewn y gilfach hon yn y diwydiant adeiladu
• Uwchraddio sgiliau yn y gweithlu lleol
• Hyrwyddo datblygu eiddo a defnyddio stoc adeiladu presennol
• Mae treftadaeth adeiladau wedi'u cadw'n dda yn darparu amgylchedd deniadol a nodedig sy'n cynorthwyo twristiaeth

Buddion Amgylcheddol

• Mae deunyddiau adeiladu traddodiadol yn naturiol yn fwy caredig i'r amgylchedd ac yn fwy cynaliadwy o'u cymharu â nifer o ddeunyddiau adeiladu modern
• Mae cynnwys y cwrs hefyd yn edrych ar gynnyrch ecolegol arloesol sydd ar y farchnad heddiw

Digwyddiadau sydd ar ddod

Am ragor o wybodaeth ac am restr lawn o gyrsiau, cliciwch ar y ddolen hon i fynd i wefan y Sgiliau Adeiladu Traddodiadol.

Gweler hefyd y Cynlluniau Rheoli Ardaloedd Cadwraethol (top) am fanylion rhagor o gyrsiau byr

Pamffledi Technegol

•   Plastro â Chalch

Cyswllt